Cİ-nin ümumi yığıncağı keçirilib 2019-02-12 15:49:00 / MÜHÜM HADİSƏLƏR

Direktor,  akademik Ramiz Məmmədovun sədrliyi ilə AMEA ak. H.Ə.Əliyev adına Coğrafiya institutunun ümumi yığıncağı keçirilib.

R.Məmmədov gündəlikdə duran məsələləri elan etdikdən sonra  elmi fəaliyyətdə fərqləndiyinə və  bu münasibətlə  AMEA-nın Fəxri fərmanı ilə təltif olunmasına görə Tibbi coğrafiya şöbəsinin kiçik elmi işçisi Turanə Hüseynovu kollektiv adından təbrik edib, ona uğurlar arzulayıb.

İnstitut Həmkarlar Təşkilatının sədri, c.ü.f.d. Habil Haqverdiyev çıxış edərək   Rəyasət Heyətinin iclasında təsdiqlənmiş "AMEA əməkdaşlarına bağçılıq-bostançılıq məqsədilə müvəqqəti istifadə üçün torpaq sahəsinin ayrılması və ondan istifadə olunması Qaydaları" haqqında sənədin icrası barədə məlumat verib. O, akademiya əməkdaşlarının sosial vəziyyətinin yaxşılaşdırılması və səmərəli istirahətinin təşkil edilməsi məqsədilə AMEA-nın “Xızı” Kənd Təsərrüfatı İstehsalat Kompleksinin balansından torpaq sahəsinin ayrıldığını bildirib.

Sənədə əsasən xüsusi komissiya yaradıldığını və ərazidə  sahə bölgüsü işləri aparıldığını qeyd edən H.Haqverdiyev  Akademiyanın elmi müəssisə və təşkilatlarının əməkdaşları üçün 63 hektar ərazidə hər biri 10 sot olmaqla 343 sahə ayrıldığını, onun 7-sinin Coğrafiya İnstitutunun payına düşdüyünü diqqətə çatdırıb. O,  torpaq sahəsinin iki il müddətinə verilməsinin nəzərdə tutulduğunu, səmərəli istifadə ediləcəyi təqdirdə müqavilənin uzadılacağını,  yaxın günlərdə ərazidə yolların çəkilməsi prosesinə başlanılacağını, sahələrdə ekoloji tələblərə riayət olunacağını da xüsusilə qeyd edib. HİK sədri bildirib ki, arzu edənlər tələb olunan sənədləri toplayıb təqdim etdikdən sonra həmin torpaqlar müsabiqə yolu ilə namizədlərə veriləcəkdir.

Sonra kadrlar şöbəsinin müdiri  Rəsul İsmayılov Əmək intizamının gücləndirilməsində nəzarətin artırılması barəsində  çıxış edib. Şöbə müdiri  bir daha AMEA prezidenti, akademik Akif Əlizadənin 23 noyabr 2018-ci il tarixli sərəncamını xatırladaraq, onun akademiyanın elmi müəssisə və təşkilatlarında elmi idarəetmənin səmərəli təşkili, işçilərin işə davamiyyətinə, əmək və icra intizamına nəzarətin gücləndirilməsi və iş vaxtının uçotunun aparılmasının təmin olunması məqsədilə imzalandığını diqqətə çatdırıb.  O, ölkəmizin Əmək Məcəlləsinə əsasən imzalanmış sənədin AMEA-nın elmi müəssisə və təşkilatlarında icra olunmasının önəminə toxunub.

 

Copyright © AMEA Akademik H.Ə.Əliyev adına Coğrafiya İnstitutu, 2019