Akademik H.Ə.Əliyev adına  Coğrafiya İnstitutunun  aparıcı elmi işçisi, c.q.f.d., dosent Starə Tarixazər yanvarın 28-də Bayıl qəsəbəsində baş verən yeni sürüşmə zonasında olub.

Alimin sözlərinə görə  Bayıl qəsəbəsinin “20-ci sahə”sindən keçən  yolun sağ istiqamətində Badamdar yaylasının yamacında baş verən sürüşmə nəticəsində 1 ictimai iaşə obyekti,  2 şəxsi mülk ziyan çəkmiş, bu ərazidən keçən avtomobil yolunda hərəkət dayandırılmışdır. Sürüşmənin  yaranmasının əsas  səbəbi  yuxarı yamaclarda  tikilən yaşayış binalarından kanalizasiya sularının yamac boyu aşağı axıdılması olmuşdur.

S.Tarixazər qeyd edib ki, bu zonada  ən aktiv sürüşmə  hadisəsi 2018-ci il oktyabrın  13-də  qeydə alınmışdı ki, bu zaman ərazidə  sürüşmənin  qarşısını almaq məqsədilə tikilən dayaq divarları  sökülmüşdü.  Çökmə kütləsinin eni 250 m, uzunluğu 200 metrdən, hündürlüyü isə 15 m.-dən çox idi.  Bu riskli sürüşmə  zonasında  11 yaşayış evi, çayxana və restoran zərər çəkmişdi.

2020-ci il yanvarın 9-da növbəti sürüşmə zamanı 100 m. enində çökmə kütləsi avtomobil yolunu bağlamışdı. 2020-ci il noyabrın 17-də də sürüşmə prosesi aktiv hal almışdı.