AR Elm və Təhsil Nazirliyinin akademik H.Əliyev adına Coğrafiya İnstitutunda  Həmkarlar Təşkilatının təşkilatçılığı ilə Cənubi Qafqaz Tədqiqatlar Mərkəzinin (CQTM) direktoru fəlsəfə üzrə fəlsəfə doktoru Fərhad Məmmədovla İnstitut kollektivinin görüşü keçirilib.

HT-nin sədri Kamran Ramazanlı qonağı görüş iştirakçılarına təqdim edərək, onun uzun illər Coğrafiya İnstitutu ilə əməkdaşlıq etdiyini vurğulayıb. O qeyd edib ki, F.Məmmədov hələ Strateji Araşdırmalar Mərkəzinin direktoru vəzifəsində işləyərkən 2013, 2014-cü illərdə Coğrafiya İnstitutu ilə birgə Ermənistanın regional təhlükəsizliyə təhdidi və qlobal dəyişmələrə adaptasiya mövzularında keçirilən Beynəlxalq elmi-praktik konfransların təşkilində iştirak edib, eləcə də İnstitutun digər elmi konfranslarında məruzələrlə çıxışlar edib.

CQTM-in direktoru dəvətə görə təşəkkürünü bildirib və “Azərbaycanın geosiyasi identikliyi” mövzusunda  təqdimatla çıxış edib. Məruzəçi çıxışında geosiyasi identikliyin strukturu, Coğrafi, dini, tarixi, mədəni-dil subidentikliyi, enerji və nəqliyyat infrastrukturu,  44 günlük müharibə dövründə təhlükələr və preventiv tədbirlər, Azərbaycanın xarici və daxili siyasəti və s. haqqında məlumat verib. Bildirilib ki,  Azərbaycanın geosiyasi identikliyi coğrafi mövqeyinin verdiyi üstünlüklər, enerji siyasəti, tarixi-mədəni irsi və çoxvektorlu diplomatik xətti ilə müəyyən olunur. Bu identiklik ölkəyə dəyişən qlobal vəziyyətlərdə sabit və çevik mövqe tutmağa şərait yaradır.  

Çıxışının sonunda Fərhad Məmmədov iştirakçıları maraqlandıran sualları geniş olaraq cavablandırıb.