Rusiyanın Moskva Dövlət Universitetinin Rusiyanın Coğrafiya fakültəsinin İqtisadi və sosial coğrafiya kafedrasının dosentləri, coğrafiya elmləri namizədləri Danşin Aleksandr və Qoryaçko Mariya fakültənin bir qrup bakalavr, magistr və doktorantı ilə birgə AR Elm və Təhsil Nazirliyinin akademik H.Əliyev adına Coğrafiya İnstitutunda olublar.

Xəzər dənizinin Azərbaycan sahillərinin müasir vəziyyətini öyrənmək və Coğrafiya İnstitutu ilə tanışlıq məqsədilə ölkəmizdə səfərdə olan ekspedisiya üzvləri ilə Coğrafiya İnstitutunun uyğun sahələrini əhatə edən coğrafiyaçıların görüşü təşkil edilib.

Coğrafiya İnstitutu haqqında qonaqlara tanışlıq  verən baş direktor professor Zakir Eminov müəssisənin tədqiqat sahələri, elmi şöbələri, görkəmli alimləri, elmi nailiyyətləri, yeni nəşrləri və s. haqqında məlumat verib.

Azərbaycanın siyasi və iqtisadi coğrafiyası şöbəsinin fəaliyyətindən söhbət açan şöbə müdiri coğrafiya elmləri doktoru Nəriman Paşayev A.Danşinlə olan şəxsi tanışlığını və onu İnstitutu dəvət etdiyini diqqətə çatdırıb.

Nümayəndə heyətinin rəhbəri A.Danşin MDU-nun coğrafiya fakültəsinin fəaliyyətindən danışıb və bildirib ki, onlar Xəzər dənizinin səviyyə  problemi ilə əlaqədar Bakıya gəlməkdən əvvəl Qazaxıstanın Astana şəhərində olublar və bu günlərdə Sumqayıt və Lənkəran şəhərlərinə gedəcəklər.

Tədbirdə prof. Zakir Eminov başda olmaqla, şöbə müdirləri – professor Əmir Əliyev, c.e.d. Səid Səfərov və Müseyib Yunusov, elmi katib c.ü.f.d. Səidə Zeynalova, c.e.d. Starə Tarixazər və qonaqların iştirakı ilə  qlobal istiləşmə və onun Xəzər dənizinin səviyyəsinə, eləcə də insan orqanizminə təsiri, Xəzərdə və çaylarda suyun azalması, demoqrafik problemlər, ekoturizm, təsərrüfatın və nəqliyyatın ərazi təşkili, siyasi-coğrafi problemlərin həlli istiqamətləri və s. bu kimi  məsələlər  müzakirə edilib, fikir mübadiləsi aparılıb.

Hər iki müəssisə arasında elmi əlaqələrin davamı və möhkəmləndirilməsi barədə razılığa gəlinib.

Sonda tərəflər qarşılıqlı olaraq bir-birlərinə hədiyyələr təqdim ediblər.