AR Elm və Təhsil Nazirliyinin akademik H.Əliyev adına Coğrafiya İnstitutunun yeni nəşri olan XIX əsrin məşhur səyyahı Hacı Zeynalabdin Şirvaninin “Səyahət bağları” kitabının 2-ci hissəsinin 2-ci cildi işıq üzü görüb.

Kitabın ideya müəllifi və elmi redaktoru  İnstitutun baş direktoru professor Zakir Eminov, tərcüməçisi  Ələddin Məlikov, redaktoru Şahin Yəhyayevdir.

Məşhur Azərbaycan səyyahı və coğrafiyaşünası H.Z.Şirvaninin uzun illər davam edən səyahəti zamanı apardığı yol qeydləri əsasında yazdığı “Səyahət bağları” əsərinin ikinci hissəsinə aid olan ikinci kitabda Türkiyə, Aralıq dənizi sahilləri, Ərəbistan, Oman və Yəmənə aid məlumatlar toplanmışdır. Kitabda həmin ərazilərin tarixi, coğrafiyası, əhalisi, adət-ənənələri, tarixi-mədəni abidələri, tarixi şəxsiyyətləri, onlarla apardığı söhbətlər haqqında zəngin məlumatlar verilir.

Kitabda xüsusən müəllifin özünün müşahidə etdiyi XIX əsrin əvvəlinə aid olan məlumatlar coğrafiyaşünaslar, tarixçilər, bu dövrdə baş verən hadisə və proseslərlə maraqlanan geniş oxucu kütləsi üçün maraqlı ola bilər.