Coğrafiyaçı iqlimşünas tornado hadisəsinə aydınlıq gətirib 2022-08-03 12:38:00 / MÜHÜM HADİSƏLƏR

AMEA akademik H.Ə. Əliyev adına Coğrafiya İnstitutunun şöbə müdiri, coğrafiya elmləri doktoru Səid Səfərov  Kəlbəcərdə baş vermiş tornado ilə əlaqədar APA TV-yə müsahibə verib.

İqlimşünas alim müsahibəsində bu təbiət hadisəsinin yaranma səbəbləri, törədə biləcəyi fəsadlar, onun ölkəmizdə təkrarlanma ehtimalı və s. kimi məsələlərə aydınlıq gətirib. O bildirib ki, tornadonun əmələ gəlməsinin konkret səbəbi elmə tam məlum olmasa da  versiyalardan biri bir-birinə əks olan isti və soyuq hava kütləsinin sürətlə fırlanaraq toqquşması və təzyiqin həddən artıq aşağı düşməsi nəticəsində yaranmasıdır. Azərbaycan üçün xarakterik sayılmayan bu hava burulğanı böyük sürətə malik olsaydı, hadisəni seyr edən insanlar üçün təhlükə yaradardı. ABŞ-da baş verən tornado zamanı xəbərdarlıq edilir və insanlar bunkerlərə yerləşdirilirlər. Alagöl üzərində baş verən tornado isə bunun kiçik variantıdır.

Alim 2012-ci ildə Qaradağdakı  həbsxana üzərində baş vermiş hadisə zamanı tornadonun həbsxana hasarlarını yerindən çıxardığını xatırladıb.

    Copyright © AMEA Akademik H.Ə.Əliyev adına Coğrafiya İnstitutu, 2022