Elmi Şuranın növbəti iclası keçirilib 2022-05-18 13:57:00 / ELMİ İCLASLAR

AMEA akademik H.Ə. Əliyev adına Coğrafiya İnstitutunda  Elmi Şuranın növbəti iclası keçirilib.

İnstitutun baş direktoru, coğrafiya elmləri doktoru  Zakir Eminov gündəlikdə duran məsələlərlə iclas iştirakçılarını tanış etdikdən sonra  iyun ayında Coğrafiya İnstitutunun  sabiq direktoru, Azərbaycan coğrafiya elminin inkişafında böyük əməyi olan akademik Ramiz Məmmədovun  vəfatının bir ili tamam olduğunu diqqətə çatdırıb. O qeyd edib ki,  İnstitut əməkdaşlarının  alim haqqındakı xatirələrinin toplanaraq  kitab halında nəşr olunması onun xatirəsinə bir töhfə olar. Xatirə kitabının hazırlanması iclas iştirakçıları tərəfindən razılıqla qarşılanıb.

Sonra Təhsil şöbəsinin müdiri, c.ü.f.d. Müseyib Yunusovun  5-6 may 2022-ci ildə keçirilən doktorant və dissertantların attestasiyasının nəticələri haqqında məruzəsi dinlənilib. Şura üzvləri Attestasiya komissiyasının qərarını yekdilliklə qəbul ediblər.

Görkəmli alim, coğrafiyaya elmləri doktoru, professor, Azərbaycanın əməkdar elm xadimi Nurəddin Kərəmovun  110 illik yubileyinə həsr olunmuş elmi-praktik konfransın keçirilməsi ilə bağlı  hazırlıq işlərinin vəziyyəti müzakirə edilib. Qərara alınıb ki, konfrans bu il iyun ayının 10-da alimin doğulduğu Şamaxı şəhərində keçirilsin.

İclasda həmçinin Şuşanın albom-xəritəsinin, eləcə  də  “Türk dünyasının coğrafiyası və etnosu” üçcildliyinin rus dilində  sonuncu cildinin hazırlanmasının vəziyyəti  və digər məsələlər də müzakirə edilib.

Copyright © AMEA Akademik H.Ə.Əliyev adına Coğrafiya İnstitutu, 2022