ETN akademik Həsən Əliyev adına Coğrafiya İnstitutunun icraçı direktoru c.ü.f.d., dosent Zaur İmrani 6-8 noyabr 2024-cü il tarixlərində İvan Cavaxişvili adına Tbilisi Dövlət Universitetinin (Gürcüstan) və Vakuşti Baqrationi adına Coğrafiya İnstitutunun (Gürcüstan) təşkilatçılığı ilə keçirilən Gürcüstan Respublikasının Coğrafiya Cəmiyyətinin 100 illik yubileyinə həsr olunmuş “Nəzəridən tətbiqi coğrafiyaya – GSG100” beynəlxalq konfransda iştirak edib.

Tədbirin əsas məqsədi gürcü və xarici alimlər arasında təcrübə mübadiləsi yaratmaq, onların beynəlxalq elmi ictimaiyyətə inteqrasiyasını təmin etmək, coğrafiya sahəsində tədqiqatların prioritet istiqamətlərini müəyyən etməklə innovativ istiqamətləri inkişaf etdirmək üçün əməkdaşlığı gücləndirmək olub.

Gürcüstan Coğrafiya Cəmiyyətinin 100 illik yubileyi şərəfinə keçirilən beynəlxalq konfrans dünya coğrafiyaçıları arasında elmi əlaqələrin daha da gücləndirilməsinə xidmət etməklə yanaşı, münsiflər heyəti tərəfindən ən yaxşı poster nominasiya üzrə qalibləri müəyyən edib, onları mükafatlandırmaq olub.

Konfransın təşkilatçılarından biri kimi Coğrafiya İnstitutunun adından c.ü.f.d., dosent Zaur İmrani “Azərbaycan və Gürcüstan Coğrafiya Cəmiyyətlərinin birgə tədqiqatlarına baxış” mövzusunda əsas məruzəçi (plenar iclasda) kimi çıxış edib. Bu iştirak beynəlxalq akademik əməkdaşlığın möhkəmlənməsinə töhfə verməklə, bilik və təcrübə mübadiləsi üçün böyük əhəmiyyət kəsb edir.