Cİ əməkdaşı elmin populyarlaşdırılmasına dair müşavirədə iştirak edib 2017-11-30 16:23:00 / MÜHÜM HADİSƏLƏR

AMEA ak.H.Ə.Əliyev ad. Coğrafiya İnstitutunun  ictimaiyyətlə əlaqələrə məsul əməkdaşı Xanım Rzazadə noyabrın 30-da AMEA Rəyasət Heyəti aparatı İctimaiyyətlə əlaqələr və elmin populyarlaşdırılması idarəsinin (İƏEPİ) elmi jurnalistikanın inkişafı və bu sahədə mövcud problemlərin  müzakirəsinə həsr etdiyi müşavirədə   iştirak edib.

 AMEA institut və təşkilatlarında fəaliyyət göstərən ictimaiyyətlə əlaqələr şöbələri rəhbərlərinin iştirakı ilə keçən müşavirədə elmi jurnalistikanın inkişafı, bu sahədə peşəkar qələm sahiblərinin yetişdirilməsi, elmi-populyar üslubda məqalələrin hazırlanması, elmin KİV-də təbliği sahəsində mövcud problemlər, onların həlli yolları müzakirə edilib.

İctimaiyyətlə əlaqələr və elmin populyarlaşdırılması idarəsinin rəisi Zülfüqar Fərzəliyev ötən il AMEA Rəyasət Heyətinin qərarı ilə akademiyanın hər bir institut və təşkilatında ictimaiyyətlə əlaqələr şöbəsinin yaradılmasının elmi jurnalistikanın inkişafı istiqamətində atılmış mühüm addımlardan olduğunu bildirib. Z.Fərzəliyev bu qərarın akademiyada müxtəlif elm sahələri üzrə jurnalistlərin hazırlanması, ixtisaslaşması baxımından əhəmiyyətini qeyd edib: “Azərbaycan elminin təbliğində onlar da populyarizator-alimlərlə birgə mühüm rol oynayırlar”.

İƏEPİ–nin rəis müavini Ülviyyə Rzayeva elmin, əldə olunan nailiyyətlərin təbliğində vacib şərtlərdən olan məqalələrin elmi-populyar üslubda hazırlanması sahəsindəki mövcud problemlərdən danışıb. O həmçinin Elmi Jurnalistlər Klubunun - www.ejk.az adlı veb-saytının yaradılması təklifi ilə çıxış edib.

AMEA-nın bəzi institut və müəssisələrinin İctimaiyyətlə əlaqələr şöbəsinin müdir  və məsul işçiləri tədbirdə çıxış edərək görülən işlər haqqında məlumat veriblər.

Copyright © AMEA Akademik H.Ə.Əliyev adına Coğrafiya İnstitutu, 2017